(ភ្នំពេញ)៖ នាព្រឹកថ្ងៃអាទិត្យ ទី១៨ ខែកុម្ភៈ ឆ្នាំ២០២៤ លោកជំទាវ ខា ឡេង រដ្ឋលេខាធិការក្រសួងពាណិជ្ជកម្ម អញ្ជើញជាអធិបតីក្នុងពិធីសម្ពោធអគារតាំងបង្ហាញរថយន្តម៉ាក ប៊ី វ៉ាយ ឌី (BYD) ដែលនាំចូលដោយក្រុមហ៊ុន ហ័ន យ៉ា ហ៊ឺ ចុង (ខេមបូឌា) ត្រេឌីង ឯ.ក។ ក្នុងឱកាសនោះ លោកជំទាវរដ្ឋលេខាធិការ ថ្លែងអបអរសាទរចំពោះក្រុមហ៊ុន ដែលបាននាំចូលរថយន្តប្រភេទអគ្គិសនីម៉ាក ប៊ី វ៉ាយ ឌី (BYD) មកកាន់ព្រះរាជាណាចក្រកម្ពុជានាពេលកន្លងមក។ លោកជំទាវរដ្ឋលេខាធិការ បន្តថា អគារតាំងបង្ហាញរថយន្តនេះ នឹងផ្ដល់ភាពងាយស្រួលដល់ក្រុមហ៊ុនក្នុងការដាក់បង្ហាញរថយន្តជូនសាធារណៈជន ជាពិសេសនឹងផ្ដល់ភាពងាយស្រួលសម្រាប់អតិថិជនមកពិនិត្យមើលរថយន្តដោយផ្ទាល់ និងជិះសាកល្បងផងដែរ។
ជាមួយគ្នានេះ លោកជំទាវរដ្ឋលេខាធិការ បានអំពាវនាវដល់បណ្តាវិនិយោគគិនទាំងក្នុង និងក្រៅប្រទេសបន្តចូលមកបណ្តាក់ទុនក្នុងព្រះរាជាណាចក្រកម្ពុជា ដែលជាទីតាំងអំណោយផលសម្រាប់ការធ្វើពាណិជ្ជកម្ម ការវិនិយោគ រួមជាមួយនឹងកត្តាសក្តានុពលជាច្រើនសម្បូរបែបផងដែរ។
