(ភ្នំពេញ)៖ នារសៀលថ្ងៃពុធ ទី១០ ខែកក្កដា ឆ្នាំ២០២៤ នៅទីស្តីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអនុញ្ញាតជូន លោក តាំង សិទ្ធី ប្រធានការិយាល័យតំណាងសភាពាណិជ្ជកម្មកម្ពុជានៅទីក្រុងមែលប៊ន ប្រទេសអូស្រ្តាលី និងឯកឧត្តមបណ្ឌិត ជឺនបូរាណ ច័ន្ទបូរី ឯកអគ្គរាជទូតកម្ពុជាប្រចាំប្រទេសអូស្រ្តាលី និងគណៈប្រតិភូបណ្តាក្រុមហ៊ុនធំៗរបស់ប្រទេសអូស្រ្តាលី ចូលជួបសម្តែងការគួរសម និងពិភាក្សាការងារ។
ក្នុងជំនួបនេះ លោក តាំង សិទ្ធី ប្រធានការិយាល័យតំណាងសភាពាណិជ្ជកម្មកម្ពុជានៅទីក្រុងមែលប៊ន បានគោរពជម្រាបជូន លោកជំទាវរដ្ឋមន្រ្តី ពីគោលបំណងនៃកិច្ចជំនួបនេះដើម្បីស្វែងយល់អំពីបរិយាកាសសេដ្ឋកិច្ច ពាណិជ្ជកម្ម និងវិនិយោគនៅកម្ពុជា ក្នុងការបង្កើតបណ្តាញទំនាក់ទំនង សិក្សាពីទីផ្សារកម្ពុជា និងកិច្ចសហប្រតិបត្តិការរវាងកម្ពុជា និងអូស្រ្តាលី។ ឆ្លៀតក្នុងឱកាសនេះ ឯកឧត្តមបណ្ឌិត ជឺនបូរាណ ច័ន្ទបូរី ឯកអគ្គរាជទូតកម្ពុជាប្រចាំប្រទេសអូស្រ្តាលី បានគោរពជម្រាបជូន លោកជំទាវរដ្ឋមន្រ្តី ពាក់ព័ន្ធនឹងសកម្មភាពដំណើរការអាជីវកម្មរបស់ក្រុមហ៊ុនអូស្ត្រាលី ដោយផ្តោតសំខាន់លើកសិកម្ម កសិ-ម្ហូបអាហារ បច្ចេកវិទ្យា ការអប់រំ ថាមពលកកើតឡើងវិញ ហេដ្ឋារចនាសម្ព័ន្ធ ភស្តុភាកម្ម និងសុខាភិបាល ដើម្បីទទួលអនុសាសន៍ណែនាំ និងមតិយោបល់ក្នុងការស្វែងយល់ពីទីផ្សារកម្ពុជាឱ្យកាន់តែស៊ីជម្រៅ។
ជាការឆ្លើយតប លោកជំទាវរដ្ឋមន្រ្តី បានគូសបញ្ជាក់ជូនគណៈប្រតិភូថា ក្រសួងពាណិជ្ជកម្មមានយុទ្ធសាស្រ្តក្នុងការជំរុញផលិតផល វិនិយោគ និងទេសចរណ៍កម្ពុជា តាមរយៈមជ្ឈមណ្ឌលពាណិជ្ជកម្មឯកជនកម្ពុជានៅក្រៅប្រទេស។ ក្នុងករណីនេះ តំណាងសភាពាណិជ្ជកម្មកម្ពុជាតំណាងទីក្រុងមែលប៊ន អាចមានលទ្ធភាពបើកមជ្ឈមណ្ឌលពាណិជ្ជកម្មឯកជនកម្ពុជានៅក្រៅប្រទេស ដែលមានតំណាងពីវិស័យឯកជនដាក់ពាក្យស្នើសុំមកកាន់ក្រសួងពាណិជ្ជកម្ម ដើម្បីបង្កើតមជ្ឈមណ្ឌលពាណិជ្ជកម្មនេះ៕
