(ភ្នំពេញ)៖ នៅរសៀលថ្ងៃទី៦ ខែកញ្ញា ឆ្នាំ២០២៤ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បាននាំអញ្ជើញដឹកនាំគណៈប្រតិភូក្រសួងពាណិជ្ជកម្ម ចូលរួមគោរពវិញ្ញាណក្ខន្ធសព ធម្មហិតាសិរីមង្គលាមហាឧបាសិកាពុទ្ធសាសនូបត្ថម្ភក៍ ជា គឹមហ៊ាប ត្រូវជាមាតាបង្កើត ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម ដែលបានទទួលមរណភាព កាលពីថ្ងៃព្រហស្បតិ៍ ៣កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៥ ខែកញ្ញា ឆ្នាំ២០២៤ វេលាម៉ោង ០០:៤៥នាទី ក្នុងជន្មាយុ ៩២ឆ្នាំ ដោយជរាពាធ។
ក្នុងឱកាសនោះ លោកជំទាវរដ្ឋមន្ត្រី និងប្រតិភូក្រសួងពាណិជ្ជកម្ម បានសម្ដែងនូវការចូលរួមរំលែកនូវមរណទុក្ខជាមួយ ឯកឧត្តមរដ្ឋលេខាធិការ និងក្រុមគ្រួសារចំពោះមរណភាពរបស់ ធម្មហិតាសិរីមង្គលាមហាឧបាសិកាពុទ្ធសាសនូបត្ថម្ភក៍ ជា គឹមហ៊ាប ដែលជាការបាត់បង់នូវមាតាបង្កើត មាតាក្មេក និងជីដូន ប្រកបដោយព្រហ្មវិហារធម៌ និងជាទីស្រឡាញ់ធ្លាប់បានបីបាច់ថ្នាក់ថ្នមថែរក្សា និងផ្គត់ផ្គង់គ្រប់បែបយ៉ាងដល់ក្រុមគ្រួសារ ព្រមទាំងអប់រំ ណែនាំ ផ្តល់ដំបូន្មានល្អៗ ដល់កូន កូនប្រសារ ចៅ ក្រុមគ្រួសារ ញាតិមិត្តជិតឆ្ងាយ និងជាគំរូដ៏ល្អសម្រាប់ក្រុមគ្រួសារ។
ស្ថិតក្នុងកាលវេលាដ៏ក្រៀមក្រំនេះ លោកជំទាវរដ្ឋមន្រ្តី និងគណៈប្រតិភូក្រសួងពាណិជ្ជកម្ម សូមចូលរួមរំលែកទុក្ខ និងឧទ្ទិសបួងសួងដល់ដួងវិញ្ញាណក្ខន្ធ ធម្មហិតាសិរីមង្គលាមហាឧបាសិកាពុទ្ធសាសនូបត្ថម្ភក៍ ជា គឹមហ៊ាប បានទៅកាន់សុខគតិភព កុំបីឃ្លៀងឃ្លាតឡើយ៕
