(ភ្នំពេញ)៖ នាថ្ងៃពុធ ទី១១ ខែកញ្ញា ឆ្នាំ២០២៤ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម បានប្រជុំពិភាក្សាជាមួយមន្ទីរពិសោធន៍ SPEC លើគម្រោងពង្រឹងប្រព័ន្ធសុវត្ថិភាពម្ហូបអាហារ សម្រាប់ឆ្នាំ ២០២៥ ក្រោមអធិបតីភាព ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. និងមានការអញ្ជើញចូលរួមពីសំណាក់ លោក លោកស្រីជាមន្ត្រីជំនាញនៃនាយកដ្ឋានមន្ទីរពិសោធន៍ និងក្រុមការងាររបស់មន្ទីរពិសោធន៍ SPEC។

កិច្ចប្រជុំនេះត្រូវបានធ្វើឡើងដើម្បីពិភាក្សាលើគម្រោងដែលត្រូវអនុវត្តនៅដើមឆ្នាំ២០២៥ ដោយផ្តោតសំខាន់ទៅលើការបណ្តុះបណ្តាលដល់ប្រតិបត្តិករអាជីវកម្មម្ហូបអាហារខ្នាតតូច-មធ្យមនិងធំ ពាក់ព័ន្ធនឹងការអនុវត្តគោលការណ៍អនាម័យជាមូលដ្ឋានគ្រឹះនៃសុវត្ថិភាពម្ហូបអាហារ ក៏ដូចជាការណែនាំពីប្រព័ន្ធ HACCP ទៅក្នុងខ្សែច្រវាក់ផលិតកម្ម ក្នុងគោលបំណងកាត់បន្ថយហានិភ័យសុខភាពរបស់អ្នកបរិភោគបង្កឡើងដោយជំងឺដែលបណ្តាលមកពីអាហារ។

បន្ថែមពីលើនេះ គម្រោងនេះក៏មានគោលបំណង លើកទឹកចិត្ត និងជំរុញ ជាពិសេសដល់ធុរជនក្នុងវិស័យកែច្នៃផលិតផលកសិឧស្សាហកម្ម អោយបានស្គាល់ពីប្រព័ន្ធសុវត្ថិភាពម្ហូបអាហារ HACCP ដើម្បីលើកកម្ពស់គុណភាពផលិតផលក្នុងស្រុក ក៏ដូចជាជំរុញការនាំចេញផងដែរ។

គួរបញ្ជាក់ផងដែរថា អគ្គនាយកដ្ឋាន ក.ប.ប. នៃក្រសួងពាណិជ្ជកម្ម បានសហការជាមួយមន្ទីរពិសោធន៍ SPEC លើគម្រោងពង្រឹងប្រព័ន្ធសុវត្ថិភាពម្ហូបអាហារ ចាប់តាំងពីឆ្នាំ២០២១ ដោយបានធ្វើការកំណត់រកមុខសញ្ញាបាក់តេរីបង្កជំងឺដែលមានសក្តានុពលគ្រោះថ្នាក់នៅតាមមុខទំនិញអាហារជាច្រើនមុន និងធ្វើការចុះណែនាំដល់ប្រតិបត្តិករអាជីវកម្មម្ហូបអាហារអោយពង្រឹងនូវការអនុវត្តមូលដ្ឋានអនាម័យនៅតាមទីតាំងលក់ ឬផលិត ដើម្បីកាត់បន្ថយគ្រោះថ្នាក់ដល់សុខភាពអ្នកបរិភោគ៕