(ភ្នំពេញ)៖ នារសៀលថ្ងៃសុក្រ ទី១៨ ខែតុលា ឆ្នាំ២០២៤ នៅទីស្តីការក្រសួងពាណិជ្ជកម្ម ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងពិធីបិទកិច្ចប្រជុំពិគ្រោះយោបល់លើកទី២ ស្ដីពី “ការត្រួតពិនិត្យឡើងវិញគោលនយោបាយពាណិជ្ជកម្មកម្ពុជាលើកទី៣” បន្ទាប់ពីរៀបចំឡើងអស់រយៈពេលបីថ្ងៃ គឺចាប់ពីថ្ងៃទី១៦ ដល់ទី១៨ ខែតុលា ឆ្នាំ២០២៤ ដើម្បីប្រមូលទិន្នន័យស្ថិតិ និងឯកសារ ចាំបាច់ ក្នុងការដាក់បញ្ចូលទៅក្នុងសេចក្តីព្រាង របាយការណ៍របស់លេខាធិការដ្ឋានអង្គការ WTO សម្រាប់ត្រៀមកិច្ចប្រជុំគោលនយោបាយពាណិជ្ជកម្មលើកទី៣ ដែលនឹងប្រព្រឹត្តទៅនាខែមីនា ឆ្នាំ២០២៥ នៅទីក្រុងហ្សឺណែវ ប្រទេសស្វីស ។

កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ ជាអនុប្រធាន និងសមាជិក នៃគណៈកម្មាធិការជាតិរៀបចំឯកសារសម្រាប់ការត្រួតពិនិត្យឡើងវិញគោលនយោបាយពាណិជ្ជកម្ម ព្រមទាំងតំណាងក្រុមការងាររបស់អង្គការពាណិជ្ជកម្មពិភពលោក (WTO) និងមន្ត្រីជំនាញ នៃក្រសួងពាណិជ្ជកម្ម ជាច្រើនរូប។

ក្នុងឱកាសនោះ ឯកឧត្តមរដ្ឋលេខាធិការ ប្រធានអង្គប្រជុំ បានសន្យាថានឹងខិតខំព្យាយាមសម្របសម្រួលជាមួយអន្តរក្រសួងបន្ថែមទៀត ក្នុងគោលបំណងប្រមូលព័ត៌មានដែលខ្វះខាត តាមការស្នើសុំរបស់ក្រុមការងារអង្គការ WTO ដើម្បីបញ្ចូលទៅក្នុងរបាយការណ៍ឱ្យមានភាពត្រឹមត្រូវ និងគ្រប់ជ្រុងជ្រោយ។ ឯកឧត្តមរដ្ឋលេខាធិការ បានបន្ថែមថា ដោយផ្អែកលើលទ្ធផលនៃការត្រួតពិនិត្យគោលនយោបាយលើកទី៣នេះ ឯកឧត្តមនឹងកំណត់រកវិស័យនានាដែលចាំចាច់ ដើម្បីស្នើសុំជំនួយបច្ចេកទេសពីអង្គការ WTO៕