(បន្ទាយមានជ័យ)៖ នាថ្ងៃទី១៦ ខែតុលា ឆ្នាំ២០២៤ មន្ត្រីជំនាញសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបន្ទាយមានជ័យ បានសហការជាមួយមន្ទីរពាណិជ្ជកម្មខេត្ត ចុះធ្វើការត្រួតពិនិត្យទំនិញតាមម៉ាតចំនួន ៦ទីតាំង ដើម្បីស្វែងរកភាពមិនអនុលោម និងទំនិញហាមឃាត់ ដែលស្ថិតនៅភូមិប៉ាលិលេយ្យ និងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងការត្រួតពិនិត្យនេះ មន្ត្រីជំនាញ បានរកឃើញ និងដកហូតទំនិញមិនមានអនុលោមភាព និងហាមឃាត់ចំនួន ២៩.៦៥គីឡូក្រាម ក្នុងនោះរួមមាន ទឹកខ្មេះរូបទន្សាយ បណ្តូលពោតកំប៉ុង ទឹកម្ទេសកញ្ចប់ និងគ្រឿងសម្អាងចម្រុះ ។
ជាមួយគ្នានេះ មន្រ្តីជំនាញបានណែនាំអោយអាជីវករត្រូវធ្វើការត្រួតពិនិត្យជាប្រចាំរាល់ទំនិញដែលដាក់តាំងលក់ និងហាមលក់ផលិតផលហាមឃាត់នេះ ដែលធ្វើអោយប៉ះពាល់សុខភាពអ្នកប្រើប្រាស់បន្តទៀត។
