(ភ្នំពេញ)៖ នាថ្ងៃសុក្រទី២៨ ខែមីនា ឆ្នាំ២០២៥ នៅសណ្ឋាគារកាំបូឌីយ៉ាណាភ្នំពេញ ឯកឧត្ដម វ៉ា រុតសាន រដ្ឋលេខាធិការក្រសួងពាណិជ្ជកម្ម បានអញ្ជើញចូលរួមជាគណៈអធិបតីក្នុងពិធីបើកនិងបិទសន្និបាតប្រចាំឆ្នាំលើកទី៥ ស្តីពីកសិ-អាហារប្រកបដោយនិរន្តរភាព ក្រោមប្រធានបទ "ការអភិវឌ្ឍប្រទេសកម្ពុជាឱ្យកាន់តែប្រសើរ៖ នវានុវត្តន៍ និងបរិវត្តកម្មអាហារប្រកបដោយនិរន្តភាព" ដោយមានការអញ្ជើញចូលរួមពីតំណាងក្រសួង ស្ថាប័ន ដៃគូសហព័ន្ធស្រូវអង្ករកម្ពុជា ដៃគូអភិវឌ្ឍន៍ វិស័យឯកជន កសិករ ម្ចាស់អាជីវកម្ម សមាគម សហគមន៍កសិកម្ម អ្នកបង្កើតគោលនយោបាយ អ្នកស្រាវជ្រាវ និងស្ថាប័នហិរញ្ញវត្ថុ ជាច្រើនរូប។

តាមការបញ្ជាក់របស់ ឯកឧត្តមរដ្ឋលេខាធិការ បានឱ្យដឹងថា សន្និបាតនេះ ធ្វើឡើងក្នុងគោលបំណង បង្កើនការយល់ដឹងអំពីនវានុវត្តន៍វិស័យកសិ-ម្ហូបអាហារប្រកបដោយនិរន្តរភាព រួមទាំងការច្នៃប្រឌិតកសិកម្ម ដំណោះស្រាយពាណិជ្ជកម្ម និងការអនុវត្តកសិកម្មកកើតឡើងវិញ វិភាគនិន្នាការទីផ្សារ និងសម្រួលដល់ការពង្រីកទីផ្សារក្នុងស្រុក និងអន្តរជាតិសម្រាប់ផលិតផលកសិកម្ម ស្វែងយល់ពីធនធានហិរញ្ញវត្ថុ និងឱកាសវិនិយោគដែលគាំទ្រដល់កំណើននៃការរីកលូតលាស់ និង និរន្តរភាពនៃវិស័យកសិម្ហូបអាហារ។

បន្ថែមពីនេះ សន្និបាតនេះ ក៏ធ្វើឡើងដើម្បីលើកកម្ពស់ការបញ្ជ្រាបគោលការណ៍សមភាពយេនឌ័រ ពិការភាព និងបរិយាបន្នសង្គម (GEDSI) ទៅក្នុងខ្សែសង្វាក់ផ្គត់ផ្គង់កសិ-ម្ហូបអាហារ ពិភាក្សា និងកំណត់គំរូភាពជាដៃគូសាធារណៈ និងឯកជនប្រកបដោយប្រសិទ្ធភាព ដើម្បីបង្កើន សន្តិសុខស្បៀង និងលើកកម្ពស់ការអនុវត្តប្រកបដោយនិរន្តរភាព បើកការផ្គូផ្គងអាជីវកម្មនិងការចុះហត្ថលេខាលើកិច្ចសន្យាកសិកម្ម ដើម្បីជំរុញការអនុវត្តក្នុងភាពជាដៃគូ ផងដែរ។