(ភ្នំពេញ)៖ នារសៀលថ្ងៃទី១៩ ខែមិថុនា ឆ្នាំ២០២៣ នៅទីស្ដីការក្រសួងពាណិជ្ជកម្ម ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានទទួលជួបសម្ដែងការគួសម និងពិភាក្សាការងារជាមួយ លោកស្រី Chenling Zhang នាយិការប្រតិបត្តិស្តីទីក្រុមហ៊ុន ONEROAD GROUP និងសហការី ដើម្បីស្វែងយល់បន្ថែមអំពីសក្កដានុពលពាណិជ្ជកម្ម និងបរិយាកាសធុរកិច្ចនៅកម្ពុជា។
ក្នុងឱកាសនោះ ឯកឧត្តមរដ្ឋមន្ត្រី បានសម្តែងនូវស្វាគមន៍យ៉ាងកក់ក្ដៅចំពោះ លោកស្រីនាយិការប្រតិបត្តិស្តីទី និងសហការី ដែលបានអញ្ជើញមកពិភាក្សាការងារ និងមានបំណងស្វែងយល់បន្ថែមពីឱកាសវិនិយោគនៅកម្ពុជា។
ឯកឧត្តមរដ្ឋមន្ត្រី បន្តថា ក្រោមកិច្ចខិតខំប្រែងរបស់រាជរដ្ឋាភិបាល ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើឱ្យបរិយាកាសធុរកិច្ចនៅកម្ពុជាកាន់តែប្រសើឡើងពីមួយថ្ងៃទៅមួយថ្ងៃ តាមរយៈការកសាងលិខិតបទដ្ឋានគតិយុត្តដើម្បីគាំទ្រដល់ការវិយោគ, ការធ្វើវិមជ្ឈការ និងវិសហមជ្ឈការលើកិច្ចការអាទិភាពមួយចំនួន និងការសម្រេចបាននូវការបើកច្រកទីផ្សារថ្មីៗបន្ថែមជាបន្តបន្ទាប់ រួមមាន៖ កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន, កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ, កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា-អេមីរ៉ាតអារ៉ាប់រួម និងកិច្ចព្រមព្រៀងជាមួយដៃគូផ្សេងៗទៀត ផងដែរ។
ជាមួយគ្នានេះ ឯកឧត្តមរដ្ឋមន្ត្រី បានលើកទឹកចិត្តដល់វិនិយោគិន និងធុរជនទាំងអស់ ជាពិសេសវិនិយោគិន និងធុរជនចិន ដែលមិនទាន់បានមកវិនិយោគនៅកម្ពុជា មកសិក្សារស្វែងយល់ និងមកវិនិយោគបន្ថែមនៅកម្ពុជា ដើម្បីប្រើប្រាស់សក្កដានុពលនានាលើវិស័យធុរកិច្ច ដែលកម្ពុជាកំពុងមាន ឱ្យបានជាអតិបរមា។
ជាការឆ្លើយតប លោកស្រីនាយិការប្រតិបត្តិស្តីទី បានថ្លែងអំណរគុណចំពោះ ឯកឧត្តមរដ្ឋមន្ត្រី ដែលបានទទួលស្វាគមន៍យ៉ាងកក់ក្ដៅ និងបានផ្ដល់នូវទស្សនាទានល្អៗ និងបរិយាយលម្អិតពីបរិយាកាសធុរកិច្ច និងវិនិយោគ នៅកម្ពុជា។
លោកស្រីនាយិការប្រតិបត្តិស្តីទី បន្តថា ក្រុមហ៊ុន ONEROAD GROUP ប្ដេជ្ញាថានឹងសហការយ៉ាងជិតស្និតជាមួយរាជរដ្ឋាភិបាលកម្ពុជា ជាពិសេសក្រសួងពាណិជ្ជកម្ម ដើម្បីទាញយក ក៏ដូចជាប្រើប្រាស់សក្កដានុពលពាណិជ្ជកម្ម ដែលកម្ពុជាកំពុងតែមាន។
នៅកិច្ចបញ្ចប់ ឯកឧត្តមរដ្ឋមន្ត្រី ថ្លែងអបអរសាទរដល់ លោកស្រីនាយិការប្រតិបត្តិស្តីទី ក៏ដូចជា ក្រុមហ៊ុន ONEROAD GROUP ដែលទើបបានប្រកាសបើកសម្ពោធ ជាផ្លូវការនូវស្នាក់ការលក់រថយន្តទំនើបម៉ាក ហ្គ្រេតវ៉ល (Great Wall) នៅទីក្រុងភ្នំពេញ និងបានជូនពរដល់ លោកស្រីនាយិការប្រតិបត្តិស្តីទី និង ក្រុមហ៊ុន ONEROAD GROUP កាន់តែទទួលបានជោគជ័យបន្ថែមទៀត៕
